Еден храбар чекор, една добра можност и две перспективи што се среќаваат во една успешна приказна. Маргарита – креативен ум што реши да ја претвори својата љубов кон дизајнот во професија и Алмедин – искусен HR менаџер кој препознава талент и знае како да го насочи на вистинското место.
Како Академијата за Графички Дизајн ѝ помогна на Маргарита да стане дел од тимот на BetOxygen? И како Кариерниот Центар на Семос Едукација ги поврзува компаниите со вистинските луѓе? Ова е нивната приказна.
Здраво Алмедин! Може ли да ни кажеш малку повеќе за себе, твоето искуство во професијата, како е да работиш во BetOxygen и што е она што најмногу ти се допаѓа во твојата работа?
Алмедин: Здраво. Ви благодарам пред се за можноста оваа „успешна приказна“ да ја споделам и со вас. Како магистар по организациски менаџмент и човечки ресурси при Економски Факултет – Скопје, одлучив дека кариерата сакам да ја градам во тој правец. Веќе 5та година се занимавам со оваа професија, прво како HR Specialist во трговијата, односно ланец на маркети, а дел од BetOxygen сум веќе 2 години и 7 месеци како HR Менаџер. Да се работи во BetOxygen е навистина голем предизвик и мотивација бидејќи сме релативно мала компанија (35 вработени), но со голем број на клиенти и простор за раст. Тука сум, поради тоа што мислам дека со вистинско залагање на еден Менаџер на човечки ресурси, ако ги пронајде вистинските луѓе и знае како да раководи со нив, компанијата ќе се движи уште постабилно и поквалитетно. Тоа највеќе ми се допаѓа во мојата работа, односно стратегискиот поглед кон Човечки Ресурси.
Од неодамна кај вас започна да работи Маргарита, една од најдобрите слушателки од нашата Академија за Графички Дизајн. Што очекувавте од кандидатите за позицијата Графички Дизајнер?
Алмедин: Искрено, мислам дека имаме еден квалитетен тим на вработени во компанијата коишто на новите вработени можат да им дадат ветер во грб и да ги научат многу работи со коишто се немаат сретнато порано. Нашиот Сениор Графички дизајнер беше спремен да донесеме ново, свежо лице на таа позиција, да има само желба и сенс за работа, а растот и развојот на новиот графички дизајнер да биде под негово менторство.
Здраво Маргарита! Кажи ни малку повеќе за себе, што те мотивираше да ја одбереш Академијата за Графички Дизајн во Семос Едукација?
Маргарита: Здраво, моето име е Маргарита. За себе можам да кажам дека сум енергичен, креативен и мотивиран графички дизајнер. Со својата посветеност и истрајност секогаш сум спремна за нови предизвици, со желба да учам и да се надоградувам. Некој што ужива во природа со добра книга и добро кафе и е секогаш е спремен да раскаже некоја добра приказна. Приказните ми се составен дел од животот. Не се сите приказни бајки, но сакам да ги раскажувам како такви. Па, следејќи ја таа, своја страна решив да се запишам на академијата за графички дизајн се со цел полесно да ги оживеам тие приказни. Да можам низ визуелни композиции да раскажам цела една приказна. Ја одбрав академијата за графички дизајн во Семос Едукација поради широката и исцрпна програма која што ја нуди. Програмата е навистина сеопфатна, со предмети коишто се фокусираат на учење низ примери, работа на реални проекти и клиенти и темелно изучување на сите алатки, принципи и правила во креативниот свет на графичкиот дизајн.
Графичкиот дизајн е баланс помеѓу техничките вештини и креативноста. Кој дел од твојата професија ти е омилен? На какви проекти работиш како Графички дизајнер?
Маргарита: Омилен дел од мојата професија е оживување на замислата, или што би рекла јас, приказната на клиентите. Кога креативно ќе го искажам она што клиентите го замислуваат. Кога еден дизајн ќе раскаже многу повеќе од она што со зборови може да се раскаже и можеби најзабавниот дел е што секој ќе ја интерпретира таа приказна на свој уникатен начин. Сите ние имаме различна призма низ која ја гледаме уметноста. Секогаш е забавно да се видат различните перспективи.
Како графички дизајнер работам на адаптација на дизајните според потребите на различни клиенти. Како што веќе кажав, мојата желба да се надоградувам и да учам ми овозможува да работам и на проекти за веб дизајн како и UI/UX.
Што беше она што ви остави најголем впечаток кај Маргарита во процесот на селекција, и како е да се соработува со неа денес?
Алмедин: Не е лесно да се направи промена во кариерата и да се почне нешто ново. Кај Маргарита највеќе ни се допадна тоа што храбро донела одлука да се занимава со нешто што навистина го сака. Од самиот почеток комуникацијата ни беше одлична, при процесот на селекција и регрутација, како и сега како наша вработена. Одговорна, посветена, со ентузијазам и желба за работа. Комуникацијата и е силна страна, веднаш „кликна“ со колегите и имаат одлична соработка.
Какво ти е досегашното работно искуство во BetOxygen?
Маргарита: Досегашното работно искуство во BetOxygen е предизвик за кој што сум мотивирана и спремна да го освојам. Имам навистина многу работи да научам за што сум исклучително среќна и благодарна. Желбата да научам, да ги подобрам своите вештини и да се надоградувам е нешто што работната средина на BetOxygen ми го овозможува. Флексибилноста и тимскиот дух се уште една работа што го прави моето досегашно искуство одлично.
Како ти помогна Кариерниот Центар во процесот на вработување?
Маргарита: Кариерниот центар беше покрај мене од самото завршување на акадамијата. Нешто што најмногу ми се допадна е што тимот на Кариерниот центар никогаш не дозволи да се демотивирам и беа во постојан контакт. Нивната посветена работа, советите за настани на кои би требало да бидам дел се со цел полесно и побрзо вработување беа во одлична корист. Нивната препорака ме донесе онаму каде што сум денес.
Веќе неколку пати соработуваме во насока на препорака на нашите најдобри слушатели од Академиите, а исто така слушателите од Академијата за .NET работеа и на реален проект под ваше менторство. Како би ја опишале соработката со Кариерниот Центар?
Алмедин: Презадоволни сме како компанија пред се, што постои еден Кариерен Центар што навистина се грижи за своите слушатели и сака и после Академијата да им најде место каде што навистина ќе го покажат тоа што го научиле. Се радуваме што постојат слушатели од вашиот Кариерен Центар што сакаат да бидат дел од нашата компанија и се надевам во иднинаа ќе продолжиме со оваа соработка, каде има реален фидбек и реална комуникација.
Од твоето долгогодишно искуство како HR Менаџер , што според тебе е она што најмногу ги издвојува добрите кандидати во процесот на селекција?
Алмедин: Од моето долгогодишно искуство како HR Менаџер, не верувам дека има премногу добар и премногу лош кандидат, мислам дека најбитно е кандидатот културолошки да одговара во компанијата каде што аплицира. Сакам кај кандидатите да видам дека тоа што ќе го работат би го работеле од што навистина сакаат и имаат љубов кон таа професија. Знаењето ќе се стекне, тоа се учи, а желбата и љубовта кон професијата се дел од нас. Да бидам искрен и тоа е еден од патоказите во мојата работа, таа желба заедно со луѓето и нивните способности да ја издигнеме компанијата на едно повисоко ниво.
Што беше највредната лекција што ја научи на Академијата?
Маргарита: Највредната лекција што ја научив на академијата е дека во тимски дух се е полесно. Многумина, ако не и повеќето, целат кон работа како фриленсери. Фриленс е нешто што секогаш ќе го имате како опција без разлика на нивото на познавање што го имате на алатките и графичкиот дизајн. И тоа е така затоа што сами си одредувате на какви проекти ќе работите. Но она што може да го постигнете во рамките на еден тим е незаменливо. Она што може да го научите е исклучително многу важно и значајно. Различните перспективи кои што ќе ви помогнат низ процесот се од огормна помош и важност. На академијата запознав многу креативци кои несебично споделуваа знаење, креативност и колегијалност, и тука ги вклучувам и професорите кои неуморно и несебично споделуваа знаење и ресурси.
Кој совет би им го дале на слушателите кои сакаат да се вработат во компанија како BetOxygen?
Алмедин: Совет којшто би сакал да им го дадам на слушателите од Академијата е да пробаат да бидат свои, без разлика колку и да научиле на Академијата треба да бидат спремни на сосема еден нов почеток во еден реален свет. Уште еден совет е на почеток да не мислат највеќе на заработката, таа ќе дојде веднаш после првиот успех, а за успех треба да се погрижат највеќе самите тие.
Маргарита: За да почнете не треба да бидете одлични, но за да бидете одлични мора да почнете. Неодамна ја прочитвав оваа реченица во една книга и ми остана врежана во сеќавање. Тоа е најдобриот совет што можам да ви го дадам. Почнете и не се откажувајтее. Секој почеток носи своја тежина, но секој следен чекор ви го олеснува процесот. И не заборавајте да го земете знаењето што сите околу вас ќе ви го понудат.
